Rrieequie lo ngbidza, loxaque ma nëëg rool. Nixse tib meedz tib lo mcal, nëz rii nëz rec riecw xpaan ma. Rbech ma tsieche ma. Ga nix ma, bdzin bla mdzin gax ga, per loxaque lo meedz rac. Rcabedz meedz, per nod ma gan tsieche ma gnaaz ma mdzin.
Goca bla ngbidz, lega naclew laa diidz bzhoon laa meedz rzacnë. Zo zo briee ma ne ziegan ma bliee ne nac diidz nix ma.
Goca tib zhmal, laa tib mëz bdzin. Laa mëz ziele sëëb len bliee, tibaque bzodze mëz, dze rui mëz lo liu. Nacne bzëbd mëz haxta len bliee, ro blieese bzo mëz bnabdiidz mëz dien pa lo rac meedz, rëb mëz:
--¿Yo luu? ¿Pa lo rac luu?
Mban rzedz yan meedz, pquiab meedz rëb meedz:
--Laa naa bii rzhizhoo, nataa ween bod zet naa. Bdedgaa haxta nu zho, ¿pe nacne rdete luu?
--Coo –rëb mëz--, maase nuse dien so naa.
Tibaque quia meedz dien zha sëëb mëz len bliee, nacne rëbchaa mëz:
--Mine naca, nli laa naa zale. Sac ran naa lo yudie nu, nzian zha ne rlu rzëëb, per rlud dien pa nëz rriee zho.
Pex gac meedz waa, ndaan meedz. Ma ne bdzin güeygan meedz, zigse bzëëb ma bliee, scase scase dow meedz ma.
Dzigotaa ptoladz meedz, mazd laa meedz guche ga laa meedz zie.
