Lega nacle tib dzew, laa bizhuan yu bdzinnie tib bich ro yu. Pa sëraa sca guxt tso mzin, laa dzeb psilo.
Dze guieel noyecw bich len yu. Riazhdraa mzin griee ma zaatne nac lidz ma, sac tibaque no bich wleets. Zigse zie dze, tsowga tsowga la xfuerz mzin noyab, sac ni tib ma rdzigd valor griee ma len lidz ma tsieguib ma ncuaane gow ma. Lad ma no tib mzin gol-le, tibtaa dzew rëb ma:
--Lëdraaw nu gon, ¿pe tibaque znu dzio ne? Telne gbiaazse ne, nu nitlo ne grë ne. None gacwguib dien zha dziuun ne bich.
Hor co pquiab stib ma, rëb:
--Scaw, ib none gac godiidz dien pe nac ncuaane dziuun ne. Nawdzegazh gotsaa ycaalsa ne, zioob ne grë ne dien pe gdzield ne zha gac bich.
Loxaque pcow liuw, laa grë mzin pcaalsa len yu co, zaatne nienle ma rcaalsa ma. Hor co laa mzin ne golraa ga pquia tib ro, gocmbe len yan ma, bnee ma rëb ma:
--Ib tedsod grëse to mban noded len dze rii, ni cho rap dol tel led bichd…
Grëse mzin rdzi guic.
--Gacxe waa –rëb ma--, ib none tipse gac ne zioob ne dien pe nac ncuaane dziuun ne parne gnitlo ne bich, sac gon telne csaan ne ib tedsod gacda xtse guxt sob bich gow bich.
Lo grë ma brieequia tib ma rëb “ib none guet bich”. Zeene bin los demás maw, grëse ma biaan diidz sca gaca.
Nacne psilo ma noguib ma dien zha gun ma parne gut ma bich. Per rdzield ma dien zhaw, rquiab tib rnee znu dziuun ne, laa stib rnee gacda squi.
Tibaque bnee tib mzin ne nguiegraa lo ma, rëb ma:
--Nli nenda grieelod dziuut ne bich, per bod zac yguib ne dien zha dziuun ne parne gacndion ne pa lo ziaad bich. Sac telne guien ne pa lo ziaad bich, zioba zhioon ne lo bich.
Zeene bin ma sca rëb mzin nguieg co, grëse ma psilo riaaz nia ma.
--Mine naca ganle –rëb mzin nguieg co--, znu riab guic naa. Led ncuaane nganda, lëë gdib tib sonaj yquiaa ne yan bich. Zaatne zietaa bich sedz sonaj. Telne yquiaa ne tib sonaj nroob yan bich zlupaa pa lo ziaad bich. Zitraa ziaad bich, laa ne ndionle pa nëz ziaad bich.
Rlozhd gac guielbley bin mzin pe nac ncuaane no gac. Grëse mzin psilo riaaz nia mzin. Lad co o tib mzin niini, tibaque bzoli ma rëb ma:
--Ne nligaa, ¡lëëgazha ga! Per nana … ¿cho tsie tsiequiaa sonaj yan bich?
Nganda dzieets ne ncuaan rii ncuaan rii gac, per par gaca led ligada.
Xcodiidz tib men brieelë Esopo
Publicado por:
© 2010 por Meinard Rnand
Derechos reservados conforme a la ley.
